तुलबहादुर कँवर मगर भालुबाङ । राप्ती गाउँपालिकाको आर्थिक वर्ष २०८१÷८२ को पहिलो त्रैमासिक अवधिको सार्वजनिक सुनुवाइ कार्यक्रम शुक्रबार सम्पन्न भएको छ । वडा नं.१ हनुमानगढी मन्दिर चोक भालुबाङमा सार्वजनिक सुनुवाइ कार्यक्रम गरिएको हो । राप्ती गाउँपालिका र मातहतका कार्यालयहरूको काम, सेवा प्रवाहका विषयमा सेवा प्रदायक र सेवाग्राहीहरुबीच अन्तत्र्रिmया गरिएको थियो । सो अवसरमा पालिकाका प्रमुख प्रशासकीय अधिकृत नेवबहादुर ओलीले आर्थिक वर्ष २०८१÷८२ को पहिलो त्रैमासिक अवधिमा गाउँपालिकाले गरेका काम र प्रगतिको प्रतिवेदन प्रस्तुत गर्नु भएको थियो । कार्यक्रममा सहभागीहरूले शिक्षा, स्वास्थ्य, कृषि, सडक, सिंचाई, विद्युत, सुशासनलगायत गाउँपालिका र मातहतका कार्यालयबाट प्रवाह गरिने सेवाका विषयमा जिज्ञासा तथा सुझाव राखेका थिए । सहभागीहरुले उठाएका सवालबारे गाउँपालिकाका अध्यक्ष प्रकाश विष्ट, उपाध्यक्ष कमलापती चौैधरी, प्रमुख प्रशासकीय अधिकृत नेवबहादुर ओली, वडा अध्यक्षहरु र विभिन्न शाखाका प्रमुखहरुले जवाफ दिनुभएको थियो । कार्यक्रममा बोल्दै गाउँपालिकाका अध्यक्ष विष्टले गाउँपालिकाको समृद्धि, विकास र नागरिकहरुको सेवामा स्थानीय सरकार निरन्तर लागि रहेको बताउनुभयो । ‘काम गर्दा ढिलो चाँडो हुन्छ नै तर राप्तीवासीको सेवामा हामी निरन्तर लागिरहेका छौं’– अध्यक्ष विष्टले भन्नुभयो– ‘राप्तीवासीको रचनात्मक सल्लाह, सुझाव र खबरदारी पनि निरन्तर भइरहोस् ।’ कार्यक्रममा पालिकाका प्रवक्ता पहलवान चौधरी, १ का अध्यक्ष गेमबहादुर खड्का, कार्यपालिका सदस्य, जनप्रतिनिधि, विभिन्न शाखाका प्रमुख, विभिन्न संघसंस्थाका प्रमुख, टोल विकास संस्थाका पदाधिकारी, संचारकर्मीलगायत स्थानीयबासीहरूको सहभागिता थियो । सार्वजनिक सुनुवाइ कार्यक्रमको सहजीकरण पत्रकार सन्तोषकुमार गुप्ताले गर्नु भएकोे थियो ।